Minister hlui Lalruatkima chuan Dampa Bial Bye-Election-ah MNF leh Congress chu inbei ber tur an nih tawh thu sawiin, "ZPM kaihhruai Sorkarin an intiamna anga ram an enkawl leh theih si loh avangin ram mipui leh a bik takin ṭhalai te'n enchhin fuhlo an inti hle tawh a, Dampa bialah leh ram pumah ZPM thli tleh tur a awm tawh lova, Dampa bialah pawh MNF elpui ber tur an ni phak tawh lo," a ti.

MNF Treasurer chuan Dampa bialah ZPM Campaigner te'n anmahni lamah an pet goal ngar ngar tih sawiin, "PWD Minister-in a pet goal hmasa ber a, Pukzing leh Silsuri inkar kawng, NESIDS sum aṭanga siam tur pawh ZPM Candidate an vote loh chuan ngaihtuah nawn lehah a vau duh a, an MLA Dr. Lorrain pawhin MCC bawhchhiain bawmrang nen damdawi ṭhahnem tak a phurlut a, Free Clinic a neih thu a post pawh 'delete' tura hriattir ngai khawpin a awm bawk," a ti.

"Chief Minister ber pawhin MCC bawhchhiain a thusawinaah scheme thar chungchang te, chi leh chi, hnam bil inhuatna chawk chhuak thei thute hial a sawi bawk a. Hengte hi ram mipuiin mak kan ti a, ZPM dinhmun tihniam belh turin anmahni lamah an pet goal zel a ni," a ti bawk.

Lalruatkima chuan, "ZPM in Candidate an in set hlum a, thlak theih a ni tawh silova, chaw chhum ût ang deuh, anmahni pawhin tui tilo zetin an campaign pui a. Kum 2023 ah 'Zoram ṭang fan fan' tih hla aṭangin 'Kan ram thlaphang' tih hlaah an lawn chho a, Fakna hla nen an zai hnuah an han Sorkar ta a, 'Jubi, Jubi' hlaah an lut daih tawh a. An inzawrhna leh insawi dan, 'ram rorelnaa Pathian lal ram tundin' tih chu an hlat tawh hle a, ti ve lo tura an intiamna zawng zawng kalsan zawngin an khawsa mek a ni," a ti.

"Pathian leh mipuite zarah MNF Candidate Dr. Thangtea thlan tlin a nih chuan Dampa bial aṭangin MNF Arsi a rawn eng chhuak ang a, kum 2028 ah Zoram pum ên turin MNF hi a Sorkar leh ngei kan ring a; kan ram leh hnam, kan sakhua humhim a, Mizoram hmasawn nan nasa zawka hna thawk turin MNF hi a lo let leh thuai dawn a ni," MNF Treasurer Lalruatkima chuan a ti bawk.